Masala hozircha FIFA bilan muhokama bosqichida.

Meksika prezidenti Eron o‘yinlarini qabul qilishga tayyorligini bildirdi

Meksika prezidenti Klaudiya Sheynbaum 2026 yilgi jahon chempionatida Eron milliy jamoasi o‘yinlarini mamlakatda o‘tkazish imkoniyati haqida fikr bildirdi.

Uning so‘zlariga ko‘ra, bu masala ayni paytda FIFA bilan muhokama qilinmoqda, chunki dastlab uchrashuvlarni AQShda o‘tkazish rejalashtirilgan edi.

«Bu masala FIFA bilan muhokama qilinmoqda, uning qanchalik amalga oshishi mumkinligini aniqlash kerak. Hozircha yakuniy qaror yo‘q, ammo Meksika barcha davlatlar bilan aloqaga ega va qaror qabul qilingach, bu haqda xabar beramiz.

Agar kerak bo‘lsa, bizda bu o‘yinlarni qabul qilish bo‘yicha muammo yo‘q», — dedi Sheynbaum.

Eslatib o‘tamiz, Eron Osiyo saralash bosqichidan muvaffaqiyatli o‘tib, JCh-2026 guruh bosqichida G guruhidan joy olgan. Ushbu guruhda Belgiya, Misr va Yangi Zelandiya ham ishtirok etadi.

Rejaga ko‘ra, Eron Yangi Zelandiya va Belgiya bilan Los-Anjelesda, Misrga qarshi esa Sietlda bahs olib borishi kerak.