Amerikaliklar «Liverpul» atrofida bir nechta klublardan iborat guruh tuzish ustida ish olib boryapti.
«Liverpul» egalari «Xetafe»ni sotib olishni rejalashtirmoqda

«Liverpul» egalari «Xetafe»ni sotib olishni rejalashtirmoqda. Bu haqida The Athletic nashri xabar berdi.

«Liverpul» klubiga egalik qiluvchi Fenway Sports Group (FSG) «Xetafe» prezidenti Anxel Torres bilan klubni bosqichma-bosqich xarid qilish bo‘yicha muzokaralar olib bormoqda. Amerikaliklar «Liverpul» atrofida bir nechta klublardan iborat guruh tuzish ustida faol ish olib boryapti.

Ilgari muzokaralar Fransiyaning «Bordo» va Ispaniyaning «Malaga» klublari bilan bo‘lgan, ammo hozirgi kunda aynan «Xetafe» eng maqbul variant sifatida ko‘rilmoqda. Maʼlumotlarga ko‘ra, Ispaniya klubi bir necha yildan beri xaridor izlab kelmoqda va Anxel Torres narxni 160 million funt sterlingdan (210 million dollar) 100 million funt sterlinggacha (135 million dollar) tushirgan.

Avvalroq «Liverpul» Isak transferi uchun rekord mablag‘ sarflashga tayyor ekani maʼlum qilingandi.