Aspilikueta: «Mourinio, Konte, Tuhel — ular bilan ishlash futbolchi sifatida meni o’stirdi»
Ispaniyalik himoyachi «Chelsi»dagi 11 yillik faoliyati haqida gapirdi.
Aspilikueta: «Mourinio, Konte, Tuhel — ular bilan ishlash futbolchi sifatida meni o’stirdi»

Ispaniyalik tajribali himoyachi Sezar Aspilikueta «Flashscore» nashriga bergan intervyusida «Chelsi»dagi faoliyati, Jozse Mourinio, Antonio Konte va Tomas Tuhel bilan ishlagan davrlarini esladi. Futbolchining so’zlariga ko’ra, «Chelsi»dagi 11 yil uning hayotidagi eng unutilmas davr bo’lgan.

«Intizom — mening eng katta kuchim edi»

«Men juda intizomli odamman. Har doim o’zimni yaxshi holatda ushlab turish uchun muayyan tartibga rioya qilganman. Bu borada juda ko’p vaqt sarfladim, chunki maqsadim har doim keyingi o’yinga tayyor bo’lish edi. 11 mavsum davomida murabbiylar menga ishonishdi, bu esa menga zavq bag’ishladi», — deydi Aspilikueta.

Uning so’zlariga ko’ra, bu intizom nafaqat mashg’ulot va parhezda, balki ruhiy barqarorlikda ham muhim rol o’ynagan:

«Angliyada futbol juda talabchan. Shuning uchun videolar ko’rib, fizioterapiya, cho’zilish mashqlari, dam olish — hammasini muntazam bajardim. Men doimo mukammallikka intilardim».

«Mourinio hamma narsani nazorat qilardi»

Mourinio davrida Aspilikueta o’z o’rnini topdi. Portugaliyalik mutaxassis uni o’ng qanot himoyachisidan chap qanot himoyachisiga o’tkazdi.

«U hamma narsani nazorat qilardi. Futbolni tushunishi, raqobatga bo’lgan yondashuvi — bular uni boshqalardan bir pog’ona yuqori qo’yardi. Dastlab menga oson bo’lmagan. Ammo u menga doimo ishonch bildirdi. Branislav Ivanovich va Eshli Koul singari kuchli raqobatchilar bor edi, lekin men ulardan o’rganib, asta-sekin asosiy tarkibda o’rnimni topdim».

Mourinio bir paytlar shunday degan edi: «Agar bizda 11 ta Aspilikueta bo’lsa, Chempionlar ligasini yutamiz».

«Bu gapni eshitganimda, bir zum hayajonlandim. Bunday so’zlarni dunyoning eng yaxshi murabbiyalaridan eshitish katta faxr», — deydi himoyachi.

«Konte tizimni o’zgartirdi va bu bizni chempion qildi»

Antonio Konte davrida «Chelsi» yangi tizim — 3-4-3 sxemasiga o’tdi. Bu qaror jamoaning o’yinida burilish yasadi.

«U juda talabchan edi. Dastlab 4-2-4, keyin 4-3-3 tizimlarida o’ynadik, ammo natija bo’lmadi. Keyin u 3-4-3 sxemasini sinab ko’rdi va biz ketma-ket 13 ta o’yinda g’alaba qozondik, dastlabki oltitasida gol o’tkazmadik. Shu ruh bizni Premer-ligani yutishga olib keldi. Men o’sha paytda markaziy o’ng himoyachi sifatida o’ynadim va bu yangi tajriba menga juda yoqdi».

«Tuhel bizni qisqa fursatda o’zgartirdi»

Tuhel «Chelsi»ni mavsum o’rtasida qabul qilib oldi va atigi bir necha oy ichida jamoani Chempionlar ligasi g’olibiga aylantirdi.

«O’rtada murabbiy almashishi har doim qiyin. Ammo u juda aniq ko’rsatmalar berdi, biz bosqichma-bosqich o’yinimizni yaxshiladik. U to’p bilan o’ynashga e’tibor qaratdi, bu esa bizga raqib maydonida to’pni ko’p qaytarish imkonini berdi. Natijada biz Chempionlar ligasini yutdik va FA Kubogi finaliga chiqdik. Eng muhimi — u bizni o’zgartira oldi, aslida esa jamoa o’sha eski jamoaning o’zi edi».

«Jon Terridan himoyalanishni o’rgandim»

Aspilikueta Mourinio davridagi sardor Jon Terri haqida ham fikr bildirdi:

«U har o’yinda, har daqiqada o’ynardi. U o’zining kuchi bilan butun jamoaga ruh bag’ishlardi. Men undan ko’p narsa o’rgandim va ikki yil o’tib, 2017 yilda o’sha natijani takrorlashga harakat qildim».

«Kante — jamoaning yuragi edi»

«N’Golo Kante maydonning har bir burchagini qoplay olardi. To’p bilan ham, to’psiz ham u ajoyib o’yinchi edi. Oddiy, ammo eng to’g’ri qarorlarni qabul qilardi. Himoyachilar uchun uning oldinda o’ynashi ishonch bag’ishlardi, chunki bilardingki, u har doim yordamga keladi».